Monsignór Solmi, atuäl vicäri episcopäl ädla djòcezi äd Mòdna-Nonàntla, l’é espèrt äd pastoräla familjära, docént äd moräla familjära a l'Istitùt superjór äd sjénsi religjózi “Ferarén” äd Mòdna e ala facoltè teològica äd l'Emìlja-Romàgna, diretór äd l'ofìssi regjonäl äd pastoräla familjära, dal Consultòri djocezàn e äd l'ofissi famìja.Nassù al 18 lùjj 1958 a San Vito äd Spilambèrt, un paéz ädla provìncia äd Mòdna indò è nasù ätor du Vèsscov. Teòlogh moräl, studjóz äd sjénsa ch’la stùdja i probléma étich e apasjonè äd calcio con ‘na grànd atensjón vérs la famìja. L’é d’ intórna a ch’il coordinädi chì la vìtta äd Don Enrico Solmi, Vicäri ädla Djòcezi äd Mòdna nominè Vèsscov äd Pärma dal Päpa Benedètt XVI. Al percórs spirituäl äd Don Solmi l’é comincè in-t-al Seminäri äd Nonàntla indò al s’è iscrìtt par portär in fónda i stùddi ginazjäl. L’ha frecuentè al licéo in-t-al seminäri magjór äd Mòdna, par trasferìros a Rèzz Emìlja par specjalizäros in filozofìa e teologìa. Al 28 zuggn 1980 l’é stè ordinè prét  da l’Arcivèsscov äd Mòdna Bruno Foresti. N’ätor  aspét fondamentäl ädla vìtta dal nóv Vèsscov, l’é al stùdi, cmé dimòstra al sogióron a Ròmma indòvva al s’é specializè  in teologìa moräla a l’Accadémia alfonsiniàna par la specializasjón in biotécnica a l’univarsitè Catòlica. Importànt jli incàrich äd don Solmi in càmp didàtich, dato che  dall’ 86  l’ insèggna teologìa moräla al stùddi teològich interdiocezàn äd Rèzz Emìlja. Dal 1987  l’ insèggna moräla a l’istitùt äd siénsi religjóz äd Mòdna. Bombén ilj incàrich su la famìja: in-t-al 91 l’é deleghè arcivescovìl par la pastoräla familjära e in-t-al 96 l’é stè nominè diretór dal céntor äd consulénsa p’r il famìji ädla diòcezi äd Mòdna. L’ùltma nòmina l’é dal 2005 cuànd l’é dvintè vicäri episcopäl par l’ eucaristìa, catecumenät, inisjatìvi äd spiritualitè, pastoräla litùrgica, familjära, giovanìl, d’ ilj ansiàn e dal socjäl. Atualmént l’é asistént spirituäl ädla scuädra äd càlcio dal Mòdna.

J  ùltom Vésscov äd Pärma predecesór dal sécol pasè. Francesco Magani dal 1893 al 1907, Guido Mari Conforti dal 1907 al 1931, Evasio Colli dal 1932 al 1971, Amilcare Pasini dal 1971 al 1981, Benito Cocchi dal 1981 al 1996, Silvio Cesare Bonicelli da 1996 al 2008.

Enrico Maletti